Badkamermoleste

Vir die van julle wat die laaste 2 jaar meer as een keer in ons huis was en die badkamer moes gebruik, sal hierdie twee prentjies bekend lyk... 

Sowat 26 maande gelede (Junie 2009) het ek en die kinders die muurpapier en die stukkende teëls van die mure in die hoofbadkamer, afgek(r)ap.  Dit het ons so ongeveer 2 dae geneem en almal het gehelp (wel, Xander en Jorienke was natuurlik nog onderskeidelik klein en kleiner...) Xander het gehelp totdat hy die hamer met soveel entoesiasme geswaai het, dat die wasbak se hoek afgekap is, die bewyse is steeds sigbaar ondanks die noodoperasie met Super glue voordat pappa tuiskom.

 

Die oudste drie kinders het elkeen 'n deel van die muur beskilder, Herno het die sonnestelsel geteken, Maricia 'n kasteel en Wicus 'n lughawe kompleet met helikopter en vliegtuig.  Xander het te groot geskrik met die hamer en wasbak-episode, hy het beleefd bedank vir die voorreg om nou 'n slag op die mure te mag teken...Na hierdie ywerigheid, het die inspirasie opgedroog (of dalk was dit die beursie wat droog gestaan het).  Projek-hoofbadkamer het stilgestaan.

Gelukkig was dit maar net hierdie projek wat so 'n bietjie vergete geraak het... ons het intussen 3 ander projekte afgehandel:  agterstoep, motorhuisdeur en voordeurpaadjie voltooi.  Nie sleg nie!  Kom kyk gerus as jy dit nog nie gesien het nie, dis werklik mooi... 

Hierdie soort projekte word (in Elmslot in elk geval) meestal slegs voltooi wanneer daar werklike druk op ons geplaas word.  Die agterstoep is klaargemaak ter ere van die besoek van 15 Nederlandse familielede (ja, almal op een slag).  Hier kon Hans en sy manne ons darem betyds help.  En ons het ten volle geniet van hierdie agterstoep toe ons saam ons 40ste verjaarsdae gevier het. 

Die herstel van die motorhuisdeur was te danke aan die feit dat Jerome sou kom en die huis sou oppas terwyl ons in Holland is, dit sou nie reg wees om van Jerome te verwag om in die middernagtelike ure die "geoutomatiseerde" motorhuisdeur met die hand op te lig nie... 

Die voordeurpaadjie het aan die beurt gekom toe ons begin dink het aan 'n eie praktyk vir Herman.  Weereens het Hans en die manne tot ons redding gekom!  Nou pas die agterstoep, voordeurpaadjie en garagepad alles mooi bymekaar.

Met Axact Accounting nou 'n konkrete deel van ons lewens, was dit gou duidelik dat 'n kantoor letterlik in die middel van die huis, nie vir Herman 'n werkbare (pun intended!) opsie is nie.  Die interne verhuising wat ons op stemdag 18 Mei 2011, aangepak het, sal nie voldoende wees nie.  Herman en Axact Accounting het meer nodig as 'n kamer in die gang tussen badkamer, slaapkamers en kombuis. 

En dit het weer lewe geblaas in projek-hoofbadkamer.  Ons is baie bly ons het destyds nie die badkamer klaar gemaak nie,  ons sou daardie tyd nie plek gemaak het vir die wasmasjien in die badkamer nie.  (Ja, sien jy, dis goed ons het gewag...) Die nuwe planne wat ons nou in werking gestel het, is om vir Herman die waskamer as kantoor in te rig.  Die wasmasjien skuif badkamer toe en die tuimeldroër na die motorhuis. Die gevolg? Stof, stof en nogmaals stof...

Die pype van ons stort het onderdeur die bad geloop.  Met die uitkap van die bad (foto links), moes hierdie pype geskuif word (boonste foto regs).  Die toiletbak en spoelbak het gelek en moes vervang word.  Die wasbak het 'n hou weg met 'n hamer ... en sou ook vervang word (onderste foto regs).

Alles bymekaar het dit 'n week geduur voorat ons nou met dankbaarheid en trots kan sê, fase een van hierdie nuwe binnenshuise verhuising, is amper afgehandel.  Ons mag nog nie die badkamer gebruik nie, die silicone wat gebruik is vir seëling, moet eers droog word.  Maar dit lyk al baie mooi.