Kleuresport - GLB: 3 Februarie 2012
Uiteindelik het die dag aangebreek... Die kinders het al vir weke geoefen aan die krete en liedjies. Die spanne is opgestel en die items verdeel. In ons eie gesin is die lojaliteite ook verdeel: Wicus is 'n by in die Geelspan en Xander is 'n panda in die Witspan. Aan entoesiasme en wedywering het dit nie ontbreek nie, maar alles in 'n gemoedelike stemming... of so het ons gedink!
Met die aanbreek van die groot geleentheid, kom ons tog agter hoe die wind waai, of miskien moet ons sê: ontdek ons jakkals se ware kleure! Die Pandas en die Bye het langs mekaar op die pawiljoene gesit en die een het harder as die ander probeer skree. Xander het met baie ywer en 'n houding van "ek-weet-hoe" aan alle singery deelgeneem en Wicus het saam met sy maat Tiaan gesorg dat die gr. 6-element duidelik hoorbaar en sigbaar was in die by-span!
Albei seuns het lekker deelgeneem aan die atletiek ook. Xander het na die wegspring van sy eerste item, eers gaan "high five" met die gr. 7-dirigente van die Bye. Dit het hulle die argwaan van meneer op die hals gehaal en vir Xander 'n tweede plek in die 50m-wedloop gegee... Toemaar, Xander was heel tevrede met sy "silwer medalje" en hy vind die dirigente van die Bye steeds oulik en vriendelik!
Wicus het baie dapper die 1200m voltooi, al was hy laaste van die lot. Dit was nog redelik warm toe ons teen sesuur by hierdie uitmergelende item uitkom. Ons is baie trots op hom dat hy die wedloop voltooi het (nogals Bybels...)
Aan die einde van die dag kan daar net een wenner wees, die Geelspan het skoonskip gemaak deur met beide die geesbeker en die atletiekbeker weg te loop. Baie geluk, Bye en welgedaan aan die Pandas en die Smurfies (Blouspan) vir goeie kompetisie en sportmansgees!
Ons sien uit na die groot atletiekbyeenkoms DV in April. Intussen welgedaan aan GLB personeel en leerders vir 'n oulike byeenkoms. Baie dankie aan Bellville Hoërskool dat ons weereens hul uitstekende geriewe mog gebruik. Oupas en oumas, ooms en tannies het dit saam met pappas en mammas geniet. Ons sê: Maak weer so!
Geniet die aksie-foto's.
Groete van die Sewevanderlindens
Comments