Iets van alles

 

Die jaar is alweer 7 weke oud... en baie het gebeur!

 

 

Om alles in een blog te probeer druk, sal wees soos om 'n gekondenseerde versie van Ps 119 in een vers te druk! Ek hou dit maar bietjie by die hoogte (en laagte-) punte...

 

Aan die einde van 2012 het ons nog Wicus se verjaarsdag gevier (dis nou mooi aansluiting by die laaste blog...).  Hy verjaar in die middel van die Desembervakansie - meestal beteken dit vir ons in die middel van ons kamp-vakansie.  Maar hierdie jaar was kamp buite die kwessie (bietjie moeilik as jy jou karavaan verkoop het en geen tent het nie...).  Om dit vir Wicus tog lekker te maak, het hy twee van sy beste maats (wat gelukkig nog nie of nie meer met vakansie was nie) genooi vir 'n film en 'n strand-piekniek.  Die film was 'n treffer, ons het dit almal geniet.  Die wind het erg gewaai hier in Bellville, maar op ons ou bekende plekkie by die Blue Peter hotel, sit ons uit die wind.  Die kinders het lekker geswem en beurte gemaak met Maricia se surf board.  En vir dié wat moeg geswem was, was daar worsbroodjies, sjokolade melk en boulles op die strand.

 

Net voor hierdie lekker verjaarsdagviering, het ons ook sommer nog 'n paar familiekuiers ingekry met tannie Femmy en oom Hilco... Een van daardie kuiers was 'n heerlike ete saam met ma Marja en Andria en Kristin uit Kanada.  Ook 'n lekker staptog in die berge by Jonkershoek. En dan 'n spesiale Kersdag met (ou)ma se spesiale maaskaastert en pappa agter die braairooster van die Weber...

En toe was dit sommer alweer gou tyd vir Xander se 7de verjaarsdag!  Op 'n Saterdag aan die begin van die skoolkwartaal - ons het dit maar eers net met nefies en niggies gevier.  Die hoogtepunte van die dag vir Xander?  Die croissants vir ontbyt en die volmaan by die see-piekniek!!

 

 

Die maand Janaurie was baie baie besig... die nuwe skooljaar het begin!  En daarmee saam allerhande vergaderings en veranderings van die gewone (gewoonte?) program.  Wicus nou ook katkisasie, Herno nou op Sondagoggende Bybelstudie en Sondagaande drink die jeug koffie in die gemeente (en is op mooi skaflike tyd van 21:00 almal weer tuis...)  Maar Januarie was ook besonder omdat ons 'n Nederlandse gas gehad het.  Die skryfster van die draaiboek wat ek in 2012 vanuit Nederlands na Afrikaans en Engels vertaal het, het vir 'n maand in ons pragtige land gekuier!

 

 

Gelukkig was dit nie elke dag 35 grade + nie, ons Nederlandse vriendin sou dit nie kon hou nie.  Maar op die dae wat dit wel warm was, was die swembad daar!  En Xander mog selfs met tannie Vic se sambreel in die swembad spring so al la Mary Poppins...

 

 

Februarie het eenvoudig aangegaan waar Januarie opgehou het.  Maricia is gekies om vir WP te verteenwoordig in 'n Interprovinsiale Kampioenskap in Oudtshoorn (2 Februarie) en danksy gulde skenkings, kon ons hierdie droom van haar bewaarheid.   Om egter in 45 grade + Oudtshoorn toe te ry met 'n kar waarvan die airconditioning nie werk nie, is nie baie opwindend nie.  En dan weet jy ook dat jy die volgende dag dieselfde pad weer terug moet!

 

Maar sy het goed gevaar en is selfs genomineer vir die WP-span vir die SA-kampioenskappe in Maart.  Maar dit sal sy ongelukkig nie kan meemaak nie, sy word DV op 12 Maart ingrypend aan haar oor en hand geopereer. 



Ek het genoem van hoogte- en laagtepunte... In kort was daar nog 'n aantal hoogtepunte, ons het 'n gesellige Kleuresport gehad by die laerskool, ons het die veldjie langs die skool opgeruim en daardeur Brownie punte vir die skool verdien (die omgewing se mense was baie trots en dankbaar), daar was 'n suksesvolle skooluitstappie na Wiesenhof.  Dit het vir Wicus, Xander en Jorienke die eerste weke van 2013 alreeds onvergeetlik gemaak.
Herno sal aan die einde van die week sy ere-kleure kry vir akademie by die hoërskool.  Hy lê 17de op die WP-skole skaak -lys vir onder 19's.

Maar daar is ook laagtepunte.  My eie gesondheid laat veel te wense oor.  Ons sal na die bloedtoets van laasweek moet oorgaan op 'n yster-drip aangesien die ferretien telling maar 2.7 is.  Om alles te bemoeilik het ek laasweek Woensdag 'n enkelligament geskeur en is afgeboek tot komende Vrydag.  En in die tyd wat ek so moet rus, is daar gister, helder oordag by ons ingebreek - terwyl ek vermoedelik in die bad was - deur 'n oop slaapkamervenster, en is Herno se laptop gesteel.  Die een waarvoor hy twee jaar lank gewerk en gespaar het!  Met al sy Franse en IT- werk op!

As ons egter terugkyk is die laasgenoemde dinge ook deurspek met seen en genade - die persoon wat ingebreek het, het nie verder in die huis ingekom nie.  Ek is ongedeerd.  Ek moet rus en sal nou die kans kry om te gaan vir die 3-ure drip-sessie om die ystervlakke op te bring.  En die val en ligament skeur het gebeur op 'n tyd wat - al is dit nooit 'n goeie tyd vir mammas om "siek" te wees nie - die logistiek van die gesin met 'n paar liewe vriendinne aangepas kon word.  Twee weke vroeër of 3 weke later, dan was die ongerief groter en die logistiek baie moeiliker! Die pyn seker nie minder nie....

En hiermee dan, in 'n neutedop, is julle almal weer op hoogte.  Liefdegroete van deur tot deur en huis tot huis.  Tot 'n volgende keer...